PARDENJOK (guzica, stražnjica, rit, prkno...)

Nojveći smrod u Harvoškuj ne gre iz fonje (septičke jame) ili nikega smetlišta. Potice ol cjadina koji je rapu ol (tuje) guzice zamislil kako - put do uspjeha. Politika i ekonomija, ali i sve drugu, rezultat su take noravi živjenjo - u šupku. 
U politiku se tako invijo ol molih nug, još u ondašnjemu Savezu omladine, kal su omladinci iskali rapu starijih drugovi sekretari, predsjedniki, direturi, upravitelji. Nastavilo se u novuj "modernuj" slobodnuj i demokratskuj Harvoškuj koja je preuzela ote "lipe" užonce. Tako se, priko rape ol guzice regrutiro većina kadra, u svim strankima, mladež ili mlodi, isti k...c, drugu pakovonje.... Na vrime. Dvižu se tako, priko tujega šupka, ol lokale i raznih inštituciji, sve do Sabora i ministarskih misti. Somo uvik vajo imat dobro polmazonu (nalojenu) glovu i znat - kome se vajo znat uvuć. 

E, da su vake guzice u koje se jalni moraju uvucivat....

Štijem po fejsu kako je mlodi hadezeovac iz jelnega harvoškega (?) groda na Proleterskemu Škoju dušal provat lokalnu vino, nazvono po jelnemu škoju a poznoto kako "Saborčica". Nazdravjot mlodi tovariš! Jedon je ol onih ca tamo di živi priznaje somo sud svoje "Partije", i živi kako je i red, u nicihovuj - guzici. Da is Linićem ili Komadinum ili, ne doj Bože, Milanovićem kogo ol nos zasede i nategne iz žmula ... (o)sudil bi ga možda isti oti Skojevac. 
Kume, buta loja i darži se! Turbulentno su vrimena, pogotovo u Hadezeu, ne zno se ku će pridobit do kraja, ni lako izmirit u cihovu ... se vajo zatuć. Je to ta, provo, karma?

A ca će kogo zamirit, j..e mi se, radi tega. Veće ol dvo puta moja je noga na istemu pardenjoku, di je njihova glova. I još ništo, rekal je oni jedon:  "Ku u šupku živi, pardac doceko kako oslobođenje!" 
Drugovi i gospodo u svim strankima, firmima, udrugima, cekojte "dobri vitar", možda se provitrite.

A dok guzica, umisto možjoni i sarca, bude na parvemu mistu, bit će nom u Kroaciji vako, kako je.

                                                               Piše: Mićo Sviličić